கோவை ராயல் கேர் சூப்பர் ஸ்பெஷாலிட்டி மருத்துவமனை மற்றும் இந்திய அவசர மருத்துவச் சங்கம் இணைந்து இதய அவசர சிகிச்சை குறித்த பயிலரங்கம் மற்றும் தொடர் மருத்துவக் கல்வி நிகழ்ச்சி நடைபெற்றது.
மருத்துவமனையின் தலைவர் மற்றும் நிர்வாக இயக்குநர் டாக்டர் மாதேஸ்வரன் தலைமை வகித்து, பயிற்சி பட்டறை முகாமை துவக்கி வைத்து பேசுகையில்: இதய நோய் பாதிப்பால் வரும் நோயாளிகளின் நோய் பாதிப்பை கண்டறிந்து விரைவாக செயல்படவும், மருத்துவர்களின் அவசர சிகிச்சைத் திறனை மேம்படுத்தவும், இதய அவசர நிலைகளில் உயிரிழப்புகளைக் குறைக்கும் வகையில் நவீன சிகிச்சை அணுகுமுறைகளைப் பகிர்ந்து கொள்ளவும் இந்தப் பயிலரங்கம் ஏற்பாடு செய்யப்பட்டுள்ளதாக தெரிவித்தார்.
சிறப்பு விருந்தினராக இந்திய அவசர மருத்துவச் சங்கத்தின் தலைவர் டாக்டர் ஸ்ரீநாத் குமார் கலந்து கொண்டு பேசுகையில்: இதய அவசர சிகிச்சையின்போது நோயாளிகளின் பாதிப்புகளை விரைவாகக் கண்டறிந்து, உரிய சிகிச்சைகளை உடனடியாக வழங்குவதன் அவசியம் குறித்து விளக்கமளித்தார்.
பயிலரங்கில் இளம் வயதினருக்கு ஏற்படும் மாரடைப்பு, இதயத் துடிப்பில் ஏற்படும் மாற்றங்கள், உயர் ரத்த அழுத்தத்தால் ஏற்படும் அவசர நிலைகள் மற்றும் நுரையீரல் ரத்தக் குழாயில் ரத்தம் அடைத்தல் போன்ற பாதிப்புகளைக் கண்டறிந்து சிகிச்சை அளிக்கும் வழிமுறைகள் குறித்து மருத்துவர்கள் மற்றும் துறை சார்ந்த நபுணர்களுக்கு பயிற்சி அமர்வுகள் நடைபெற்றன.
அவசர சிகிச்சைப் பிரிவில் உயிரைக் காக்கும் சிகிச்சை முறைகள், இதயத் தடுப்பு ஏற்படும் நேரத்தில் மேற்கொள்ள வேண்டிய உடனடி நடவடிக்கைகள் மற்றும் நோயாளிகளைப் பாதுகாப்பாகக் கையாள்வது குறித்தும் மருத்துவக் கருத்துகள் பகிரப்பட்டன.
கருத்தரங்கிற்கான ஏற்பாடுகளை, மருத்துவர்கள் கண்ணன் தங்கவேலு, திவ்யா, கமலகண்ணன், ராஜ் விஷ்ணு, அகிலன், இளவரசன் மற்றும் மருத்துவ இயக்குநர் டாக்டர் பரந்தாமன், தலைமைச் செயல்பாட்டு அலுவலர் டாக்டர் மணிசெந்தில்குமார், மார்க்கெட்டிங் பிரிவு சீனியர் பொது மேலாளர் வெங்கடேசன் ஆகியோர் செய்தனர்.
