கோவை ரயில்வே சந்திப்பில் இன்று தெற்கு ரயில்வே பொது மேலாளர் மற்றும் சேலம் கோட்ட ரயில்வே மேலாளர் ஆகியோரைச் சந்தித்த கோவை NXT அமைப்பினர், கோவையில் ரயில்வே உள்கட்டமைப்பை மேம்படுத்துதல், கூடுதல் ரயில் சேவைகளை அறிமுகப்படுத்துதல், பயணிகளுக்கான வசதிகளை அதிகரித்தல், புறநகர் ரயில் இணைப்புகளை மேம்படுத்துதல் உள்ளிட்ட கோரிக்கைகளை முன்வைத்தனர்.
இந்தக் குழுவுக்கு கொங்கு குளோபல் ஃபோரத்தின் துணைத் தலைவர் வனிதா மோகன் தலைமை வகித்தார். இந்திய வர்த்தக மற்றும் தொழில் சபைத் தலைவர் துரைராஜ், இந்திய தொழில்துறை கூட்டமைப்பின் (CII) தலைவர் நவுஷாத், RAAC தலைவர் பாலசுப்ரமணியன், சிறுதுளி அறங்காவலர் சதீஷ், சுங்கத் தரகர்கள் மற்றும் கப்பல் முகவர்கள் சங்கத்தின் சார்பில் திலீப் உள்ளிட்டோர் பங்கேற்றனர்.
மேலும், இந்திய வர்த்தக மற்றும் தொழில் சபையின் துணைத் தலைவர்கள் சஞ்சனா விஜயகுமார், நடராஜன், முன்னாள் தலைவர் டி. பாலசுந்தரம், செயலாளர் பிரதீப், சிறுதுளி அமைப்பின் வழிகாட்டுதல் குழு உறுப்பினர் சந்திரசேகர் உள்ளிட்டோரும் கலந்துகொண்டனர்.
தெற்கு ரயில்வேயில் அதிக வருவாய் ஈட்டும் முக்கிய ரயில் நிலையங்களில் ஒன்றான கோவை சந்திப்பின் வளர்ச்சி நீண்டகாலமாகப் புறக்கணிக்கப்பட்டு வருவதாகவும், அதன் மேம்பாட்டுக்கு உடனடியாக முக்கியத்துவம் அளிக்க வேண்டும் என்றும் குழுவினர் வலியுறுத்தினர்.
முன்வைக்கப்பட்ட முக்கிய கோரிக்கைகள் :
கோவை – சென்னை வந்தே பாரத் ரயிலில் கூடுதல் பெட்டிகள்: அதிகரித்து வரும் பயணிகளின் தேவையைப் பூர்த்தி செய்ய கூடுதல் பெட்டிகளை இணைக்க வேண்டும்.
கோவை – திருவனந்தபுரம் வந்தே பாரத் ரயில்: புதிய வந்தே பாரத் ரயில் சேவையை அறிமுகப்படுத்த வேண்டும்.
தென் மாவட்டங்களுக்கு நேரடி ரயில் சேவை: மீட்டர்கேஜ் காலத்தில் இருந்த ரயில் சேவைகள் உள்ளிட்ட தென் தமிழக மாவட்டங்களுக்கான நேரடி ரயில் இணைப்புகளை மீண்டும் ஏற்படுத்த வேண்டும்.
கோவையைத் தவிர்த்துச் செல்லும் ரயில்களை மாற்றுப்பாதையில் இயக்குதல்: கோவை சந்திப்பைப் புறக்கணித்துச் செல்லும் ரயில்களை கோவை சந்திப்பு வழியாக இயக்க நடவடிக்கை எடுக்க வேண்டும்.
கோவை சந்திப்பை மேம்படுத்துதல்: கூடுதல் உள்கட்டமைப்பு வசதிகள், மேம்பட்ட பயணிகள் வசதிகள் மற்றும் ஒரே நேரத்தில் பல ரயில்களை இயக்குவதற்கான வசதிகளை ஏற்படுத்த வேண்டும்.
கோவை தெற்கு – போத்தனூர் சந்திப்பு மேம்பாடு: இந்தத் திட்டத்தை விரைவுபடுத்த வேண்டும்.
கோவை வடக்கு ரயில் நிலையம்: கூடுதல் தீவு நடைமேடைகளை (Island Platforms) அமைத்து, அந்த நிலையத்தை ரயில் முனையமாக (Terminal) அறிவிக்க வேண்டும்.
புறநகர் ரயில் நிலையங்கள் மேம்பாடு: இருகூர், சிங்காநல்லூர், கிணத்துக்கடவு, பீளமேடு உள்ளிட்ட புறநகர் ரயில் நிலையங்களில் நடைமேடைகள் மற்றும் பயணிகள் வசதிகளை மேம்படுத்த வேண்டும்.
வட்டாரப் புறநகர் ரயில் இணைப்பு: கோவையின் வளர்ந்து வரும் மாநகரப் பகுதி மக்களின் தேவையைப் பூர்த்தி செய்ய திருப்பூர், பொள்ளாச்சி, பாலக்காடு ஆகிய பகுதிகளுடன் வட்டார ரயில் இணைப்புகளை வலுப்படுத்த வேண்டும்.
ரயில்வே நிலங்களில் பசுமையை அதிகரித்தல்: சிறுதுளி அமைப்புடன் இணைந்து, ரயில்வே நிலங்கள் மற்றும் நிலையங்களில் உள்ளூர் மரவகைகளை அதிக அளவில் நடவு செய்து பசுமைப் பரப்பை அதிகரிக்க வேண்டும்.
கோவை NXT குழுவினர் முன்வைத்த கோரிக்கைகளை தெற்கு ரயில்வே பொது மேலாளரும், சேலம் கோட்ட ரயில்வே மேலாளரும் பொறுமையாகக் கேட்டறிந்து, அவற்றைப் பரிசீலித்து உரிய நடவடிக்கை எடுப்பதாக உறுதியளித்தனர்.
