கோவை அவிநாசி சாலை மேம்பாலத்தின் இறுதிக்கட்டப் பணிகள் வேகமாக நடந்து வரும் நிலையில், ஹோப் காலேஜ் பகுதியில் மேம்பால இணைப்பு பணி நடைபெறவுள்ளதால் போக்குவரத்தில் மாற்றம் செய்யப்படுவதாக அறிவிக்கப்பட்டுள்ளது.
ஹோப் காலேஜ் பகுதியில் ரயில்வே பாலத்தின்மேல் இரும்பு மேல்தளம் அமைத்து மேம்பாலத்தை இணைக்கும் பணி நடைபெறவுள்ளது. இதனால் ஜூலை 9ம் தேதி முதல் 13ம் தேதி வரை தினமும் இரவு 11 மணி முதல் காலை 6 மணி வரை பயனியர் மில் சந்திப்பு முதல் கோவை மருத்துவக் கல்லூரி வரை இருபுறமும் அனைத்து வாகனங்களும் செல்ல தடை விதிக்கப்படுகிறது.
போக்குவரத்து மாற்றம்
மாநகரில் இருந்து வெளியில் செல்லும் கனரக வாகனங்கள், வெளியூர் பஸ்கள் உட்பட அனைத்து பேருந்துகளும் லட்சுமி மில்ஸ் சந்திப்பில் இருந்து வலதுபுறம் திரும்பி ராமநாதபுரம், சிங்காநல்லுார், ஒண்டிப்புதுார் வழியாக எல் அண்ட் டி பைபாஸ் சாலை வழியாகவோ அல்லது காந்திபுரம், கணபதி, சரவணம்பட்டி, விளாங்குறிச்சி, காளப்பட்டி வழியாகவோ அவிநாசி சாலையை அடைந்து செல்ல வேண்டிய இடங்களுக்கு செல்லலாம்.
மாநகருக்குள் வரும் கனரக வாகனங்கள், ஆம்னி பேருந்துகள் உட்பட அனைத்து பேருந்துகளும் தொட்டிப்பாளையம் பிரிவில் இருந்து வலதுபுறம் திரும்பி தொட்டிபாளையம், காளப்பட்டி, விளாங்குறிச்சி, சரவணம்பட்டி வழியாகவோ அல்லது சிட்ரா சந்திப்பில் இருந்து, ‘யூ டர்ன்’ செய்து காளப்பட்டி ரோடு, விளாங்குறிச்சி, சரவணம்பட்டி வழியாகவோ அல்லது நீலம்பூரில் இருந்து, எல் அண்ட் டி பைபாஸ் வழியாக ஒண்டிப்புதுார், சிங்காநல்லுார், ராமநாதபுரம் வழியாக நகருக்குள் வரலாம்.
மாநகரில் இருந்து வெளியேறும் இரு சக்கர, நான்கு சக்கர வாகனங்கள் பயனீயர் மில் சந்திப்பில் இருந்து, இடதுபுறம் திரும்பி ரொட்டிக்கடை மைதானம், காந்தி மாநகர், தண்ணீர் பந்தல், டைடல் பார்க் வழியாக அவிநாசி சாலையை அடையலாம்.
மாநகருக்குள் வரும் கார், பைக்குகள் சித்ரா சந்திப்பு அல்லது கொடிசியா சந்திப்பு அல்லது சி.எம்.சி சந்திப்பில் இருந்து வலது புறம் திரும்பி டைடல் பார்க், தண்ணீர் பந்தல், காந்திமா நகர், ரொட்டிக்கடை மைதானம், பயனியர் மில்ஸ் வழியாக, அவிநாசி சாலையை அடைந்து நகருக்குள் வரலாம்.
சிங்காநல்லுார் செல்லும் வாகனங்கள், எல் அண்ட் டி பைபாஸ் சாலையில் சிந்தாமணிபுதுார், ஒண்டிப்புதுார் வழியாக செல்லலாம். சிங்காநல்லுாரில் இருந்து ஹோப்ஸ் செல்லும் வாகனங்கள் பெர்க்ஸ் பள்ளி, ஜி.வி.ரெசிடென்சி, பன்மால் வழியாக, பயனீயர் மில்ஸ் அடைந்து காந்திமாநகர், தண்ணீர் பந்தல் வழியாக, அவிநாசி சாலையை அடையலாம்.
