மார்பகப் புற்றுநோயை ஆரம்ப நிலையிலேயே கண்டறிந்து உரிய சிகிச்சை பெறுவதன் அவசியத்தை வலியுறுத்தும் வகையில், கோவை ஜெம் மருத்துவமனை சார்பில் ‘பிங்க் கொங்கு’ என்ற பெயரில் இரண்டு மாத இலவச மார்பக நல விழிப்புணர்வு முகாம் தொடங்கப்பட்டுள்ளது.
அக்டோபர் மற்றும் நவம்பர் மாதங்களில் நடைபெறும் இம்முயற்சி, பெண்கள் தங்கள் மார்பக ஆரோக்கியத்தில் அக்கறை செலுத்தவும், மருத்துவப் பரிசோதனைகளைத் தயக்கமின்றி மேற்கொள்ளவும் ஊக்குவிப்பதை நோக்கமாகக் கொண்டுள்ளது.
ஜெம் மருத்துவமனையின் மார்பக சிகிச்சைப் பிரிவான ஜெம் பிரெஸ்ட் சென்டர் மூலம் நடத்தப்படும் இம்முகாமில், மார்பக அறிகுறிகள் இல்லாத 40 வயது மற்றும் அதற்கு மேற்பட்ட பெண்களுக்கு இலவச மேமோகிராம் பரிசோதனை வழங்கப்படுகிறது.
மார்பகத்தில் கட்டி, காம்பில் இருந்து திரவம் வெளியேறுதல், மார்பகத்தின் அளவு அல்லது வடிவத்தில் மாற்றம், தோலில் மாற்றங்கள் உள்ளிட்ட அறிகுறிகள் உள்ள பெண்கள் வயது வித்தியாசமின்றி மருத்துவ மதிப்பீட்டைப் பெறலாம். தேவைக்கேற்ப கூடுதல் பரிசோதனைகளும் பரிந்துரைக்கப்படும்.
மார்பகப் புற்றுநோய் ஆரம்ப நிலையில் வலியின்றியும் வெளிப்படையான அறிகுறிகள் இன்றியும் இருக்கலாம். மேமோகிராம் என்பது மார்பகத்தில் ஏற்படும் சந்தேகத்திற்குரிய மாற்றங்களைக் கண்டறிய உதவும் சிறப்பு எக்ஸ்-ரே பரிசோதனையாகும். மார்பகத்தில் புதிதாக ஏதேனும் மாற்றங்கள் தென்பட்டால், அவை புற்றுநோயாகத்தான் இருக்க வேண்டும் என்ற அவசியமில்லை என்றாலும், மருத்துவ ஆலோசனை பெறுவது அவசியம்.
பரிசோதனை குறித்த அச்சம், தயக்கம், கூச்சம் மற்றும் விழிப்புணர்வின்மை போன்ற காரணங்களால் பெண்கள் மருத்துவ ஆலோசனையைத் தள்ளிப்போடுவதைத் தவிர்க்க வேண்டும்.
குடும்பத்தில் மார்பகப் புற்றுநோய் அல்லது கருப்பைப் புற்றுநோய் பாதிப்பு இருந்தால், தனிப்பட்ட மருத்துவ ஆலோசனையின் அடிப்படையில் பரிசோதனைத் திட்டத்தைத் தீர்மானிப்பதும் முக்கியம்.
பெண்களிடையே மார்பக ஆரோக்கியம் குறித்த விழிப்புணர்வை அதிகரித்து, ஆரம்பகாலக் கண்டறிதலை ஊக்குவிப்பதே ‘பிங்க் கொங்கு’ முகாமின் முக்கிய நோக்கமாகும்.
வயது, அறிகுறிகள் மற்றும் தனிப்பட்ட ஆபத்துக் காரணிகளின் அடிப்படையில் உரிய பரிசோதனைகளை மேற்கொள்ளவும் மருத்துவர்களின் ஆலோசனையைப் பெறவும் இம்முயற்சி வலியுறுத்துகிறது.
இலவச மார்பக நல முகாம் நவம்பர் மாத இறுதி வரை ஜெம் மருத்துவமனை, ஜெம் பிரெஸ்ட் சென்டர், கோவை என்ற முகவரியில் நடைபெறுகிறது. முன்பதிவு மற்றும் விவரங்களுக்கு: 7530033945.
