வடகிழக்கு பருவமழை தொடங்கியுள்ள நிலையில் கோவையிலும் கடந்த சில நாட்களாக கனமழை பெய்து வருகிறது. மாலை, இரவு நேரங்களில் பல்வேறு பகுதிகளில் கனமழை பெய்யும் நிலையில், தண்ணீர் பல இடங்களில் தேங்கியுள்ளது. இதனால் மக்கள் சிரமம் அடைகின்றனர்.
இந்த நிலையில் மதுவிலக்கு துறை அமைச்சரும், கிணத்துக்கடவு சட்டமன்ற தொகுதி உறுப்பினருமான விக்னேஷ், தன் தொகுதியில் மழை பாதிப்பினால் ஏற்படும் பிரச்சனைகளை தீர்க்க தவெக தொண்டர்கள் முன்வரவேண்டும் என வேண்டுகோள் விடுத்துள்ளார்.
இதுகுறித்து தொண்டர்களுக்கு அவர் அனுப்பியுள்ள ஆடியோ பதிவில் கூறியிருப்பதாவது: தற்போது மழைக்காலம் தொடங்கி விட்டது. கோவையில் அதிக மழை பொழிவு இருக்கும் என செய்திகளில் கூறப்படுகிறது. தற்போது நான் சென்னையில் உள்ளேன். கோவைக்கு வர முடியாத சூழலில் உள்ளேன். ஏன் என்றால், முதல்வர் தொகுதியின் பொறுப்பு அமைச்சராக என்னை நியமித்துள்ளனர்.
நம் தொகுதியில் மழையினால் போக்குவரத்து பாதிப்பு, தண்ணீர் தேங்குதல் போன்ற செய்திகளை பார்க்க முடிகிறது. வார்டு, பகுதி, நகரம், ஒன்றியம், ஊராட்சி என்ற பாகுபாடு இல்லாமல், மூன்று அல்லது நான்கு வீதிகளுக்கு ஒரு பொறுப்பாளரை நியமித்து, அந்த வீதிகளில் தண்ணீர் முறையாக வருகிறதா?, சாலைகள் சரியாக உள்ளதா?, குப்பைகளை முறையாக எடுக்கப்படுகிறதா?, சாக்கடைகள் சரியாக தூர்வாரப்படுகிறதா?, பேருந்து பிரச்சனைகளை போன்றவை உள்ளதா என பார்க்க வேண்டும்.
அரசு அதிகாரிகள், அரசு அலுவலர்கள் தான் பணி செய்யவேண்டும் என்றில்லாமல், நாமே கடந்த காலங்களில் களத்தில் இறங்கி பல வேலைகளை செய்துள்ளோம். இந்த அனுபவம் நமக்கு இருக்கும்.
சாலைகளில் பள்ளம் இருந்தால், மண் போட்டு சாலைகளை சரி செய்யலாம். தண்ணீர் வசதி, சாக்கடை அடைப்பு போன்ற பிரச்சனைகளுக்கு நாமே களத்தில் இறங்கி, தூய்மை பணியாளர்களுடன் இணைந்து செயல்பட வேண்டும். மக்களின் அடிப்படை தேவைகளை பூர்த்தி செய்யும் வகையில், தவெக தொண்டர்கள், நிர்வாகிகள் வேலை செய்ய வேண்டும். இந்த மழைக்காலத்தில் தேவையான பணிகளை மக்களுக்கு செய்து கொடுங்கள். இவ்வாறு அவர் கூறினார்.
