கோவை காந்திபுரம் மத்திய சிறைச்சாலை வளாகத்தில் செம்மொழி பூங்கா அமைக்கப்பட்டு வருகிறது. இதில் மூலிகை தோட்டங்கள், நீரூற்றுக்கள், மலை குன்றுகள், உணவகங்கள், படிப்பகங்கள், குழந்தைகள் சிறுவர்கள் விளையாடும் பகுதிகள் என பல்வேறு பொழுதுபோக்கு அம்சங்களுடன் கட்டப்பட்டு வருகிறது.
இதன் திறப்பு விழா மற்றும் ஏற்பாடுகள் குறித்து நகராட்சி நிர்வாகத்துறை அமைச்சர் கே.என்.நேரு இன்று பார்வையிட்டார். அப்போது தி.மு.க மண்டல பொறுப்பாளர் செந்தில் பாலாஜி, மேயர் ரங்கநாயகி, கலெக்டர் பவன்குமார், மாநகராட்சி ஆணையர் சிவகுரு பிரபாகரன் மற்றும் அதிகாரிகளும் உடன் சென்றனர்.
செம்மொழி பூங்கா பணிகள் நடைபெற்று வரும் ஒவ்வொரு பகுதியாக சென்று அமைச்சர் ஆய்வு செய்தார். பணிகளை விரைவாகவும், சிறப்பாகவும் செய்து முடிக்கும்படி அதிகாரிகளுக்கு உத்தரவிட்டார்.
செய்தியாளர்கள் சந்திப்பில் அமைச்சர் கூறியதாவது: செம்மொழி பூங்கா இறுதி கட்டப் பணிகள் மிகவும் சிறப்பாக நடைபெற்று வருகிறது. அனைத்து பணிகளும் குறிப்பிட்ட தேதிக்குள் செய்து முடிக்கப்படும்.
பூங்காவை 25ம் தேதி காலை 11 மணிக்கு நடைபெறும் விழாவில் தமிழக முதலமைச்சர் ஸ்டாலின் திறந்து வைக்க உள்ளார். பிறகு பூங்காவில் உள்ள மூலிகை தோட்டங்கள் உள்பட அனைத்து பகுதிகளையும் பார்வையிடுகிறார். பள்ளி மாணவ, மாணவிகள் மத்தியில் கலந்துரையாடுகிறார்.
முதலமைச்சர் திறந்து வைத்ததும் பொதுமக்கள் பார்வைக்கு அனுமதி அளிக்கப்படும். டிசம்பர் 1 முதல் அனுமதிக்கலாம். மழை பெய்தாலும் திட்டமிட்டபடி குறிப்பிட்ட தேதியில் பூங்கா திறக்கப்படும். திறப்பு விழாவிற்காக அவசர அவசரமாக பணிகள் நடைபெறவில்லை எனக் கூறினார்.
