மாணவர்களின் பேச்சாற்றல் மற்றும் கருத்துகளை வெளிப்படுத்தும் திறனை மேம்படுத்தும் வகையில், ஐ.சி.டி. அகாடமி சார்பில் நடத்தப்படும் ‘யூத் டாக்’ பேச்சுப் போட்டியின் மண்டல இறுதிச் சுற்று, கோவை கே.பி.ஆர். பொறியியல் மற்றும் தொழில்நுட்பக் கல்லூரியில் நடைபெற்றது.
கல்லூரியின் முதல்வர் அகிலா வரவேற்புரையாற்றினார். சிறப்பு விருந்தினராக ஐ.சி.டி. அகாடமியின் ஆராய்ச்சி வெளியீடுகள், உள்ளடக்க மேம்பாடு மற்றும் தர உறுதிப் பிரிவுத் தலைவர் நரேந்திர கோபால் பங்கேற்று பேசினார்.
பேச்சுத் திறன் மதிப்பீட்டுப் போட்டியில் 10 மாணவர்கள் பங்கேற்று தங்களது கருத்துகளை எடுத்துரைத்தனர். தொழில்துறை வல்லுநர்கள் அடங்கிய நடுவர் குழுவினர், மாணவர்களின் தகவல் தொடர்புத் திறன், கருத்துகளின் தரம் மற்றும் பேச்சாற்றல் ஆகியவற்றின் அடிப்படையில் மதிப்பீடு செய்தனர்.
போட்டியின் முடிவில், 10 மாணவர்களில் சிறப்பாகப் பேசிய 3 பேர் இறுதிப் போட்டிக்குத் தேர்வு செய்யப்பட்டனர். இவர்களுக்கான இறுதிப் போட்டி வரும் நவம்பர் 18-ம் தேதி நடைபெற உள்ளது.
